«Сказание о Князьях Владимирских»

«А Великого Князя Рюрика четвертое колено Великий Княз Володимер, иже просветил Русьскую Землю Святымъ Крещеньем в лето 6496. А от Великого Князя Владимира четвертое колено Княз Великий Владимир Всеволодич Манамах, правнук. Егда седе в Киеве на Великом княжении, совет начят творити с князми своими и с боляры и велможи, тако рек: «Егда аз мал есмь преже мене царствовавших и Хоругви правящих Скипетра Великиа Русиа, якоже Князь Великий Олег ходил и взял с Цариграда великую дань на вся воа своа и здрав въсвояси возвратися; и потом Всеслав Игоревич, Княз великий, ходил и взял на Коньстянтине граде тяжьчайшую дань. А мы есмя Божиею милостью настолницы своих прародителей и отца моего Великого Князя Всеволода Ярославичя и наследницы тоя же чести от Бога. Ныне съвета ищу от вас, моея полаты князей, и боляр, и воевод, и всего христолюбиваго воиньства; да превознесется имя Святыа Живоначалныа Троици вашея храбрости могутьством Божьею волею с нашим повелением; и кий ми совет против воздаете?» Отвещаста же Великому Князю Владимиру Всеволодичю его князи, и боляре, и воеводы: «Сердце Царево в руце Божьи, и мы вси есмо в твоей воле». Княз же Великий Владимир събирает воеводы благоискусны и благоразумны и поставляет чиноначалники над различными воиньствы — тысущники, сотники, пятдесятники над различными чинми боренья; и съвокупи многия тысяща воиньства, и отпусти их на Фракию, Цариграда области; и плениша я доволно и возвратишася с многим богатеством. Тогда бе в Цариграде Благочестивый Царь Константин Манамах, и в то время брань имея с Персы и с Латыною. И съставляетъ советъ мудре и царьски, отряжает послы к Великому Князю Владимиру Всеволодичю: Неофита Митрополита Ефесьскаго и с ним два епископа, милитиньскаи митилиньска, и стратига Антипа Антиохийскаго, игемона Иерусалимъскаго Еустафия, и иных своих благородных. От своея же выя снемлет Животворящий Крест от самого Животворящаго Древа, на немъже распятся Владыка Христос. Снемлет же от своея главы Венець Царьский и поставляет его на блюде злате. Повелевает же принести крабьицу сердоликову, из неяже Августия, Царь Римъский, веселяшеся, и ожерелье, иже на плещу своею ношаше, и чепь от злата аравьска исковану, и ины многи дары Царьскиа. И предаде их митрополиту Неофиту сь епископы и своим благородным посланником, и посла их к Великому Князю Владимиру Вселодичю, моля его и глаголя: «Прийми от нас, о боголюбивый благоверный Княже, сиа честныа дарове, иже от начатка вечных лет твоего родьства и поколенья царьский жребий, на славу и честь и на венчание твоего волнаго и Самодержавнаго Царствиа. И о немже начнут тя молити наши посланницы, что мы от твоего благородиа просим мира и любве, яко церкви Божьа безмятежна будет, и все православие в покои пребудет под сущею властью нашего Царства и твоего волнаго Самодержавъства Великиа Русиа, яко да нарицаешися отселе боговенчаньный Царь, венчан сим Царьским Венцем рукою святейшаго митрополита кир Неофита с епископы». И от того времени Княз Великий Владимир Всеволодичь наречеся Манамах, Царь Великиа Русия. И пребысть потом прочаа времена с Царем с Констянтином в смирении и любве. И оттоле и доныне тем Венцем венчаются Царским Велиции Князи Володимерьстии, егоже прислал Греческий Царь Коньстянтин Манамах, егда ставятся на Великое Княжение Русьское".